Blue Car Rental undirritaði samning við Kolvið en samkvæmt honum geta viðskiptavinir Blue Car Rental valið að kolefnisjafna akstur sinn á bílum leigðum hjá fyrirtækinu, frá og með 1. janúar 2020.
Þorsteinn Þorsteinson, framkvæmdastjóri Blue Car Rental og Reynir Kristinsson, formaður Kolviðar undirrituðu samninginn þann 13. nóvember.
Hópbílar í Hafnarfirði hafa samið við Kolvið um að kolefnisjafna rútuakstur félagsins ásamt vinnutengdum flugferðum starfsmanna frá og með árinu 2020.
Þetta mun vera stærsti samningur sem Kolviður hefur gert við íslenskt fyrirtæki til þessa en áætlanir gera ráð fyrir að gróðursett verði um 18.600 tré árlega á rúmlega 7 hektara lands.
Pálmar Sigurðsson, skrifstofu- og umhverfisstjóri félagsins var mjög ánægður að lokinni undirskrift. „Við erum mjög meðvituð um umhverfisáhrif starfseminnar og það er einlæg stefna okkar að lágmarka þau áhrif og bæta stöðugt árangur í umhverfismálum. Við höfum ætíð gert umhverfisvernd hátt undir höfði í starfsemi okkar samanber það að árið 2003 vorum við með fyrstu fyrirtækjum landsins til að innleiða umhverfisstjórnunarkerfi samkvæmt umhverfisstaðlinum ISO 14001. Við erum því mjög stolt að vera einnig leiðandi í að stíga það stóra skref að kolefnisjafna akstur rútuflotans, fyrstir rútufyrirtækja“ .
Reynir Kristinsson, stjórnarformaður Kolviðs sagði mjög mikilvægt að fá fyrirtæki eins og Hópbíla í lið með Kolviði. „Við hjá Kolviði fögnum mjög þessu skrefi sem Hópbílar eru að taka í dag. Það er afar mikilvægt að stór fyrirtæki í svona rekstri sýni í verki samfélagslega ábyrgð og taki þátt í að vinna gegn þeirri vá sem losun gróðurhúsalofttegunda er. Við hlökkum mjög til þessa samstarfs við Hópbíla“.
Hópbílar hafa samhliða þessum samningi innleitt hjá sér rekstrarkerfi frá Klöppum grænum lausnum hf. sem kortleggur og safnar saman í grænt bókhald heildarnotkun félagsins á olíu, úrgangi, rafmagni og heitu og köldu vatni og reiknar út CO2 losun vegna þeirra þátta. Það kemur til með að gagnast félaginu mjög vel við að ná betri árangri í umhverfismálum.
Eignarhaldsfélagið Festi hf. og dótturfélögin N1, Krónan, Bakkans og ELKO skrifuðu nýlega undir samning við Kolvið sem felur í sér að útreiknuð losun gróðurhúsalofttegunda vegna beinna áhrifa frá rekstri Festar og dótturfyrirtækjanna verður kolefnisjöfnuð.
Samningurinn gildir fyrir tímabilið 2018 til 2019.
Rúmlega 5.000 tré koma til með að verða gróðursett til að framkvæma kolefnisbindinguna, en það jafngildir um tveimur hekturum af skóglendi árlega á þeim svæðum sem Kolviður hefur umsjón með.
Hafa fyrirtæki innan Festar áður stigið álíka græn skref. Fyrir þetta verkefni var innleidd hugbúnaðarlausn frá Klöppum grænum lausnum hf. til að kortleggja og reikna út losun gróðurhúsalofttegunda frá starfsemi fyrirtækjanna.
Eggert Þór Kristófersson, forstjóra Festar og Reynir Kristinsson, stjórnarformaður Kolviðs, við undirritun samningsins.
Bónus hefur nú kolefnisjafnað rekstur verslana sinna fyrir árið 2018, en Bónus og Kolviður undirrituðu samning þess efnis þann 21. maí.
Í samstarfi við fyrirtækið Klappir Grænar Lausnir hf. var kolefnisspor verslana Bónus um land allt, árið 2018, reiknar, en umhverfisstjórnunarhugbúnaður Klappa hefur nú verið innleiddur í verklag Bónus, sem mun hjálpa fyrirtækinu að ná enn betri árangri í umhverfismálum. Samkvæmt útreikningum var losun Bónsu árið 2018 667 tonn CO2 og verða 6.670 tré gróðursett til að jafna það út, sem mun í framtíðinni mynda um 2 hektara skóg.
Ölgerðin Egill Skallagrímsson hf. hefur gert samning við Kolvið um að kolefnisjafna helming heildarlosunar fyrirtækisins. Ölgerðin er, líkt og mörg önnur stór fyrirtæki, búin að innleiða heildstæða hugbúnaðarlausn, Klappir Core frá fyrirtækinu Klappir, Grænar lausnir hf. Hugbúnaðurinn vaktar losun í rauntíma og stuðlar þannig að minni losun og bættri yfirsýn yfir reksturinn. Mjög er þetta í anda Kolviðar sem hefur frá upphafi lagt áherslu á minni losun og að óhjákvæmileg losun sé kolefnisjöfnuð.
Andri Þór Guðmundsson, forstjóri Ölgerðarinnar og Reynir Kristinsson, stjórnarformaður Kolviðar, við undirritun samningsins.
Ársfundur Kolviðar var haldinn á fyrsta degi þorra og var vel sóttur. Um var að ræða hádegisfund og var boðið upp á ljúffenga grænmetissúpu og brauð frá Sölufélagi garðyrkjumanna.
Reynir Kristinsson, stjórnarformaður Kolviðar, rakti rekstrartölur Kolviðar frá upphafi. Umtalsverð aukning hefur orðið í sölu kolefnisbindingar og þá sérstaklega síðast liðin þrjú ár. Unnið hefur verið að stefnumótun fyrir sjóðinn og tókst að ljúka henni fyrir áramót. Í kjölfarið var ákveðið að endurnýja vefsíðu Kolviðar.
Einar Gunnarsson, stjórnarmaður Kolviðar, greindi frá skógræktarverkefnum sjóðsins.
Dr. Brynhildur Bjarnadóttir, lektor við Háskólann á Akureyri, fjallaði um rannsóknir sínar og annarra á kolefnisbindingu í trjám og gróðri. Að lokum fjölluðu Björn Traustason, sérfræðingur á Rannsóknarstöð Skógræktarinnar á Mógilsá, og Einar Sveinbjörnsson veðurfræðingur um hugmyndir að loftslagsskógi á Mosfellsheiði. Auk þess að binda kolefni myndi slíkur skógur skýla byggð á höfuðborgarsvæðinu fyrir tíðum austanáttum og verða útivistarskógur líkt og Heiðmörkin.
Fundargestir gerðu góðan róm að því sem bar á góma og horfa björtum augum til framtíðar.
Erindi Reynis Kristinssonar (pdf)
Erindi Einars Gunnarssonar (pdf)
Nýverið var skrifað undir samning milli Kolviðar og Lykils um að kolefnisjafna bílaflota Lykils. Framtak Lykils er lofsvert í ljósi þess að fyrirtækið er að taka á sig losun viðskiptavina sinna.
Kolviður skuldbindur sig þar með til að gróðursetja 10.000 tré á ári til að kolefnisjafna 1.000 tonna losun á CO2.
F.v. Einar Gunnarsson stjórnarmaður Kolviðar, Reynir Kristinsson stjórnarformaður Kolviðar og Sverrir Viðar Hauksson, sviðstjóri viðskiptasviðs Lykils fjármögnunar.
Gróðursetning í Kolviðarskóginum er kominn á fullan skrið en þar verða gróðursettar a.m.k. 60 þúsund plöntur í ár. Á síðasta ári stóð Kolviður fyrir gróðursetningu á 89.979 plöntum á Úlfljótsvatni og 16.785 plöntur voru gróðursettar á Geitasandi. Alls voru því gróðursettar 106.764 plöntur í Kolviðarskóga á síðasta ári og lætur nærri að það sé um 4% allra gróðursettra skógarplantna ársins.
Nýverið tryggði Kolviður sér birkifræ til að nota í verkefnum sínum á næstu árum. Vegna langvarandi vanefnda stjórnvalda á framlögum til skógræktar hafa plöntuframleiðendur einn af öðrum verið að hellast úr lestinni. Nú er fullkomnasta skógarplöntustöð landsins, Barri ehf á Fljótdalshéraði, að leggja niður starfsemi og selja frá sér alla lausa muni. Það varð úr að Kolviður keypti birkifræforða Barra sem geymdur er í Svíþjóð. Um er að ræða birkifræ af Bæjarstaðauppruna safnað í Bolholti á Rangárvöllum og Tinmýri á Hallormsstað.
Nýverið bættust nokkur fyrirtæki í hóp þeirra sem kolefnisjafna hluta starfsemi sinnar í gegnum Kolvið og eru það fyrirtækin Bergs, sem flytur út ferskan fisk, Efla verkfræðistofa, Landsnet, Neyðarlínan, Nordic Green travel og Vodafone. Greinilegt er að vaxandi skilningur er á nauðsyn þess að taka ábyrgð á eigin losun gróðurhúsalofttegunda með mótvægisaðgerðum. Að beina sjónum að kolefnisbókhaldi leiðir einnig til aðgerða til að draga úr losun, t.d. með því að kaupa vistvænni bíla, og hvetja starfsfólk til vistvænni ferðamáta. Þá hafa Valitor og Vodafone boðið starfsmönnum að kolefnisjafna einkabifreiðar með sérstökum samningi þar um. Fleiri fyrirtæki eru í samningaferli og því er ekki laust við að farið sé að lifna yfir Kolviði kappa. Á eftir löngum vetri kemur vor.
Þórunnartún 6, 105 Reykjavík
Sími 551 8150 (Skógræktarfélag Íslands er í sama númeri)- Netfang kolvidur@kolvidur.is
Bankaupplýsingar - Banki 0301 26 8228 - Kennitala 560606 1170
Nýlegar athugasemdir