All Posts By

a8

Ölgerðin gerir samning við Kolvið

Eftir | Fréttir

Ölgerðin Egill Skallagrímsson hf. hefur gert samning við Kolvið um að kolefnisjafna helming heildarlosunar fyrirtækisins. Ölgerðin er, líkt og mörg önnur stór fyrirtæki, búin að innleiða heildstæða hugbúnaðarlausn, Klappir Core frá fyrirtækinu Klappir, Grænar lausnir hf. Hugbúnaðurinn vaktar losun í rauntíma og stuðlar þannig að minni losun og bættri yfirsýn yfir reksturinn. Mjög er þetta í anda Kolviðar sem hefur frá upphafi lagt áherslu á minni losun og að óhjákvæmileg losun sé kolefnisjöfnuð.

Andri Þór Guðmundsson, forstjóri Ölgerðarinnar og Reynir Kristinsson, stjórnarformaður Kolviðar, við undirritun samningsins.

Ársfundur Kolviðar 2019

Eftir | Fréttir

Ársfundur Kolviðar var haldinn á fyrsta degi þorra og var vel sóttur. Um var að ræða hádegisfund og var boðið upp á ljúffenga grænmetissúpu og brauð frá Sölufélagi garðyrkjumanna.

Reynir Kristinsson, stjórnarformaður Kolviðar, rakti rekstrartölur Kolviðar frá upphafi. Umtalsverð aukning hefur orðið í sölu kolefnisbindingar og þá sérstaklega síðast liðin þrjú ár. Unnið hefur verið að stefnumótun fyrir sjóðinn og tókst að ljúka henni fyrir áramót. Í kjölfarið var ákveðið að endurnýja vefsíðu Kolviðar.

Einar Gunnarsson, stjórnarmaður Kolviðar, greindi frá skógræktarverkefnum sjóðsins.

Dr. Brynhildur Bjarnadóttir, lektor við Háskólann á Akureyri, fjallaði um rannsóknir sínar og annarra á kolefnisbindingu í trjám og gróðri. Að lokum fjölluðu Björn Traustason, sérfræðingur á Rannsóknarstöð Skógræktarinnar á Mógilsá, og Einar Sveinbjörnsson veðurfræðingur um hugmyndir að loftslagsskógi á Mosfellsheiði. Auk þess að binda kolefni myndi slíkur skógur skýla byggð á höfuðborgarsvæðinu fyrir tíðum austanáttum og verða útivistarskógur líkt og Heiðmörkin.

Fundargestir gerðu góðan róm að því sem bar á góma og horfa björtum augum til framtíðar.

 

Erindi Reynis Kristinssonar (pdf)

Erindi Einars Gunnarssonar (pdf)

Erindi Brynhildar Bjarnadóttur (pdf)

Erindi Björns Traustasonar og Einars Sveinbjörnssonar (pdf)

Kolefnisjafnaður flutningur á grænmeti

Eftir | Fréttir

Glöggir neytendur hafa vafalítið rekist á merki Kolviðar á gómsætu og fersku grænmeti frá Sölufélagi garðyrkjumanna. Samningur milli Sölufélags garðyrkjumanna og Kolviðar um að kolefnisjafna flutning og dreifingu frá garðyrkjubónda og út í verslanir var nýverið undirritaður í beinni útsendingu útvarpsþáttarins Í bítið á Bylgjunni. Forsvarsmenn Kolviðar eru ákaflega ánægðir með að geta gert góða vöru með hlutfallslega lágt fótspor enn vistvænni. Fyrirhugað er að kolefnisjöfnunin eigi sér m.a. stað í Skálholti sem er miðsvæðis í miklu garðyrkjuhéraði, en þegar hefur verið gróðursett  í Kolviðarskóginn á Úlfljótsvatni vegna losunar fyrir yfirstandandi ár.

 

IKEA kolefnisjafnar starfsemi sína

Eftir | Fréttir

Í dag var undirritaður samningur Kolviðar og IKEA um kolefnisjöfnun starfseminnar en áður hafði ráðgjafa- og hugbúnaðarfyrirtækið Klappir tekið út starfsemi IKEA. Er helmingur losunar IKEA kolefnisjafnaður hjá Kolviði.

Samningurinn gildir frá og með 2017 og tekur til 885 tonna af CO2  og skuldbindur Kolviður sig til að gróðursetja 8.850 tré til að binda umsamið magn.

Reynir Kristinsson, stjórnarformaður Kolviðar (t.v.) og Þórarinn Ævarsson, forstjóri IKEA, takast í hendur að lokinni undirskrift samnings um kolefnisjöfnun.

Lykill kolefnisjafnar bílaflotann

Eftir | Fréttir

Nýverið var skrifað undir samning milli Kolviðar og Lykils um að kolefnisjafna bílaflota Lykils. Framtak Lykils er lofsvert í ljósi þess að fyrirtækið er að taka á sig losun viðskiptavina sinna.

Kolviður skuldbindur sig þar með til að gróðursetja 10.000 tré á ári til að kolefnisjafna 1.000 tonna losun á CO2.

F.v. Einar Gunnarsson stjórnarmaður Kolviðar, Reynir Kristinsson stjórnarformaður Kolviðar og Sverrir Viðar Hauksson, sviðstjóri viðskiptasviðs Lykils fjármögnunar.

Kolviður kaupir 12 milljónir birkifræja

Eftir | Fréttir

Nýverið tryggði Kolviður sér birkifræ til að nota í verkefnum sínum á næstu árum. Vegna langvarandi vanefnda stjórnvalda á framlögum til skógræktar hafa plöntuframleiðendur einn af öðrum verið að hellast úr lestinni. Nú er fullkomnasta skógarplöntustöð landsins, Barri ehf á Fljótdalshéraði, að leggja niður starfsemi og selja frá sér alla lausa muni. Það varð úr að Kolviður keypti birkifræforða Barra sem geymdur er í Svíþjóð. Um er að ræða birkifræ af Bæjarstaðauppruna safnað í Bolholti á Rangárvöllum og Tinmýri á Hallormsstað.

Kolefnisjöfnuðum fyrirtækjum fjölgar

Eftir | Fréttir

Nýverið bættust nokkur fyrirtæki í hóp þeirra sem kolefnisjafna hluta starfsemi sinnar í gegnum Kolvið og eru það fyrirtækin Bergs, sem flytur út ferskan fisk, Efla verkfræðistofa, Landsnet, Neyðarlínan, Nordic Green travel og Vodafone. Greinilegt er að vaxandi skilningur er á nauðsyn þess að taka ábyrgð á eigin losun gróðurhúsalofttegunda með mótvægisaðgerðum. Að beina sjónum að kolefnisbókhaldi leiðir einnig til aðgerða til að draga úr losun, t.d. með því að kaupa vistvænni bíla,  og hvetja starfsfólk til vistvænni ferðamáta. Þá hafa Valitor og Vodafone boðið starfsmönnum að kolefnisjafna einkabifreiðar með sérstökum samningi þar um. Fleiri fyrirtæki eru í samningaferli og því er ekki laust við að farið sé að lifna yfir Kolviði kappa. Á eftir löngum vetri kemur vor.

Valitor og Kolviður ganga til samstarfs

Eftir | Fréttir

Kolviður og Valitor gerðu nýverið samning um kolefnisjöfnun vegna flugferða og bílanotkunar á vegum Valitor. Jafnframt kveður samningurinn á um frekari þróun samstarfs þar sem fleiri þættir í starfseminni verði kolefnisjafnaðir í framtíðinni. Einnig eru í samningnum tímamótaákvæði um að starfsmenn Valitor eru af fyrirtækinu hvattir til að skilja bílinn eftir heima en kolefnisjafna akstur til og frá vinnu ella. Nánar er sagt frá samstarfi Valitor um kolefnisjöfnun við starfsmenn og Kolvið hér.

Vel heppnuð ráðstefna Festu

Eftir | Fréttir

Festa, félag fyrirtækja með samfélagsábyrgð, ásamt Reykjavíkurborg héldu í morgun ráðstefnu um leiðir til að draga úr kolefnislosun og hvernig binda má þá losun sem óhjákvæmilega á sér stað vegna reksturs fyrirtækja og samfélagsins.

Erindi fluttu Hlynur Óskarsson, deildarstjóri umhverfisdeildar Landbúnaðarháskóla Íslands, sem fjallaði um endurheimt votlendis, Þórunn Pétursdóttir, sérfræðingur á þróunarsviði Landgræðslu ríkisins, fjallaði um landgræðslu og Bjarni Diðrik Sigurðsson, prófessor við Landbúnaðarháskóla Íslands, fjallaði um kolefnisjöfnun með skógrækt. Reynir Kristinsson, stjórnarformaður Kolviðar, fjallaði um hvernig Kolviður býður viðskiptavinum sínum úr atvinnulífinu að kolefnisjafna starfsemi sína með öruggum, gagnsæjum og rekjanlegum hætti.

Erindi Reynis má nálgast hér.   

Erindi Bjarna Diðriks má nálgast hér.

„Ábyrgð fyrirtækja í loftslagsmálum“. Erindi stjórnarformanns Kolviðar.

Eftir | Fréttir

Landsvirkjun stóð fyrir vel heppnaðri ráðstefnu í Gamla bíói þann 4. mars s.l.  Yfirskrift ráðstefnunnar var mjög í anda Kolviðar, „Ábyrgð fyrirtækja í loftslagsmálum“ og voru flutt fjölmörg fróðleg erindi. Þar á meðal var erindi Reynis Kristinssonar stjórnarformanns Kolviðar sem hægt er að nálgast hér.

Kolviður vill koma á framfæri sérstökum þökkum til Landsvirkjunar og samstarfsaðila sem að þessu sinni komu frá Landbúnaðarháskóla Íslands, Rannsóknarstöð Skógræktar ríkisins, Landgræðslu ríkisins, Skógræktarfélagi Íslands, Samtökum iðnaðarins auk Kolviðar. Fleiri slíkir fundir eru boðaðir á árinu en Landsvirkjun fagnar nú 50 ára starfsafmæli.

Upptöku frá ráðstefnunni má skoða hér