Skip to main content
Flokkur

Fréttir

Kolviður og Festir gera með sér samning

Eftir Fréttir

Kolviður undirritaði nýlega samning við fasteignaþróunarfélagið Festir, en markmið hans er að binda kolefni – CO2 – sem til fellur vegna uppbyggingar Festis á Héðinsreitnum í Vesturbæ Reykjavíkur. Uppbygging Festis telur um 210 íbúðir, auk atvinnurýma og bílakjallara. Festir lét gera lífsferilsgreiningu fyrir svæðið, þ.e. meta umhverfisáhrif af byggingarframkvæmdinni auk búsetu, alls yfir 60 ára tímabil.

Mun Kolviður gróðursetja tré til að vega upp á móti útreiknaðri losun.

Reynir Kristinsson, formaður stjórnar Kolviðar

„Þetta er með stærri samningum sem Kolviður hefur gert og er Kolviður sérlega ánægður með þá ábyrgð sem Festir sýnir með þessu, en rannsóknir sýna að töluverður hluti kolefnislosunar á heimsvísu kemur frá byggingariðnaði“.

Róbert Róbertsson, framkvæmdastjóri Festis

„Ljóst er að við uppbyggingu fasteigna losnar mikið af kolefni út í andrúmsloftið. Með þessum samningi stígur Festir stórt skref með því að kolefnisjafna bæði framkvæmdina sjálfa og áætlaða losun á líftíma bygginganna. Verkefnið á Héðinsreit verður byggt í áföngum á næstu 3-4 árum en samningurinn við Kolvið gerir ráð fyrir að gróðursetning trjáa fyrir alla uppbygginguna og losun á líftíma bygginganna fari öll fram á þessu sumri.

Samninginn undirrituðu Reynir Kristinsson, formaður stjórnar Kolviðar og Róbert Róbertsson, framkvæmdastjóri Festis.

F.v. Reynir Kristinsson, stjórnarformaður Kolviðar og Róbert Róbertsson, framkvæmdastjóri Festis.

Samningur um kolefnisbindingu

Eftir Fréttir

Þriðjudaginn 8. febrúar 2022 var undirritaður þríhliða samningur milli HS Veitna, Kolviðar og Lionsklúbbs Keflavíkur varðandi kolefnisbindingu á móti útblásturs CO2 frá bifreiðum HS Veitna.
Reiknaður útblástur CO2 frá bifreiðum fyrirtækisins nam 141,7 tonnum árið 2021. Lionsklúbbur Keflavíkur í samstarfi við Kolvið mun gróðursetja plöntur og halda utan um kolefnisbindingu fyrirtækisins.

Við þetta tækifæri sagði Júlíus Jónsson forstjóri HS Veitna: „Það er stefna fyrirtækisins að ganga vel um í hvívetna. Liður í því er að minnka kolefnisspor fyrirtækisins eins og hægt er. Fyrirtækið er á góðri leið með að skipta yfir í umhverfisvænni orkugjafa í bílaflota fyrirtækisins og er stefnan að ná því takmarki á allra næstu árum eftir því hvernig þróun rafbíla af öllum gerðum gengur. Þangað til gróðursetjum við tré til mótvægis“.

Við þetta tækifæri sagði Reynir Kristinsson frá Kolvið: „Þetta þríhliða samstarf í loftslagsmálum er einkar skemmtilegt þar sem Lionsklúbbur Keflavíkur hafði frumkvæðið að því að koma á tengslum milli Kolviðar og HS Veitna með það að markmiði að binda losun útblásturs bifreiða HS Veitna. Kolviður mun á þessu ári planta 1.420 trjáplöntum sem fá það hlutverk að binda þessa losun. Kolviður vinnur nú að því að fá alþjóðlega ISO vottun á starfsemi sinni á þessu ári.“

Við þetta tækifæri sagði Rafn Benediktsson formaður Lionsklúbbs Keflavíkur: „Lionsklúbbur Keflavíkur er sérstaklega stoltur af því að hafa hvatt HS Veitur til samfélagslegrar ábyrgðar með bindingu kolefnislosunar sinnar í samvinnu við Kolvið. Þessi merkilega samningur er í anda eins af fimm átaksverkefna Lions International og gerir hann okkur ekki eingöngu kleift að halda áfram áralangri trjáræktarsögu okkar heldur einnig að styðja áfram góð málefni á svæðinu.“


Glaðbeittir við undirritun: Júlíus Jónsson forstjóri HS Veitna, Reynir Kristinsson Kolviði og Rafn Benediktsson formaður Lionsklúbbs Keflavíkur.

Samningur undirritaður við Bifreiðaverkstæði Kópavogs

Eftir Fréttir

Kolviður undirritaði nú í lok nóvember samning við Bifreiðaverkstæði Kópavogs um kolefnisbindingu á móti losun frá starfsemi verkstæðisins. Er samningurinn hluti af umhverfisstefnu fyrirtækisins, en það vinnur samkvæmt ISO 14001 umhverfisstjórnunarstaðlinum.

Allir ánægðir að undirskrift lokinni. Linda Reynisdóttir og Auðunn Ásberg Gunnarsson frá Bifreiðaverkstæði Kópavogs og Reynir Kristinsson (f. miðju), stjórnarformaður Kolviðar.

Nýr samningur við Höldur – Bílaleigu Akureyrar undirritaður

Eftir Fréttir

Kolviður undirritaði nýlega samning við Höldur – Bílaleigu Akureyrar, en markmið hans er að gefa viðskiptavinum Hölds tækifæri til að binda kolefni á móti þeirri losun sem til fellur vegna aksturs þeirra. Viðskiptavinir Hölds geta nú við bókun á leigu valið kolefnisbindingu í bókunarferlinu.

Skrifuðu Jón Gestur Ólafsson, gæða-, umhverfis- og öryggisstjóri Hölds og Reynir Kristinsson, stjórnarformaður Kolviðar, undir samninginn.

Ársfundur Kolviðar 2021

Eftir Fréttir

Ársfundur Kolviðar 2021 verður haldinn þriðjudaginn 12. október kl. 11-13 í sal Garðyrkjufélags Íslands (Síðumúla 1, gengið inn Ármúlamegin).  Allir áhugasamir velkomnir – vinsamlegast tilkynna mætingu fyrir hádegi mánudaginn 11. október.

Dagskrá:

Kolviður – skýrsla stjórnar
 Reynir Kristinsson stjórnarformaður Kolviðar

Klappir: Útreikningar losunar og binding í samstarfi við Kolvið
Jón Ágúst Þorsteinsson, framkvæmdastjóri Klappir Grænar lausnir

Kvistabær: Plöntuframleiðsla – möguleikar
María E. Ingvadóttir, Kvistabæ

Skógræktin: Skógarkolefni, kolefnisreiknir og vottun
Gunnlaugur Guðjónsson, sviðstjóri, Skógræktin

Kolviður 15 ára

Hádegishressing

Fundarstjóri: Jónatan Garðarsson, formaður Skógræktarfélags Íslands

 

Bilun í greiðslugátt á vefsíðu

Eftir Fréttir

Greiðslugátt og vefverslunarkarfa hér á vefnum virka ekki eins og stendur (12.08.2021). Búið er að hafa samband við vefþjónustufyrirtæki og er verið að vinna í að finna bilunina og vonumst við til að þetta komist fljótt í lag. Ef þið viljið kaupa kolefnisbindingu þá vinsamlegast reynið aftur síðar eða notið millifærslu (Bankaupplýsingar – Banki 0301  26  8228 – Kennitala 560606  1170).

Kolviður í samstarf við Lionsklúbb Keflavíkur og Skógræktarfélag Suðurnesja

Eftir Fréttir

Kolviður hefur undirritað samstarfssamning við Lionsklúbb Keflavíkur og Skógræktarfélag Suðurnesja. Samstarfið lýtur að því að Lionsklúbbur Keflavíkur mun hvetja fyrirtæki og einstaklinga á Suðurnesjum til úrbóta í loftslagsmálum með því að kolefnisbinda hjá Kolviði og mun Lionsklúbburinn fá hlutfall af þeim viðskiptum sem til koma vegna hvatningar þeirra. Mun Lionsklúbburinn svo nýta hluta þeirrar upphæðar sem í þeirra hlut kemur til að styðja Skógræktarfélag Suðurnesja til ræktunar á yndisskógi við Seltjörn.

Boðið verður upp á þann möguleika á heimasíðu Kolviðar að merkja kaup á kolefnisbindingu Lionsklúbbnum og er sá möguleiki í vinnslu.

Frá undirritun samningsins: Rafn Benediktsson (sitjandi t.v.) frá Lionsklúbbi Keflavíkur og Berglind Ásgeirsdóttir (sitjandi t.h.) frá Skógræktarfélagi Suðurnesja setja nöfn sín á samninginn, ásamt Reyni Kristinssyni, formanni Kolviðar (lengst til hægri). Mynd: BJ

Gjafabréf Kolviðar

Eftir Fréttir

Það kannast örugglega margir við þann vanda að kaupa jólagjöf handa einhverjum sem „á allt“. Einnig vilja sífellt fleiri draga úr neyslu og kaupa minni óþarfa, sem safnast svo bara upp á heimilum. Fyrir fólk í þessum sporum viljum við benda á jólagjafamöguleika: gjafabréf Kolviðar.

Fyrir 2.200 kr. má gefa fólki kolefnisbindingu upp á 1 tonn CO2, með gróðursetningu. Auk þess að binda kolefni hefur trjágróður/skógur auðvitað mörg önnur jákvæð umhverfisáhrif, svo sem að skapa skjól, miðla vatni og vinna gegn jarðvegseyðingu. Með því að gefa kolefnisbindingu hjá Kolviði hjálpar þú til við að græða land skógi á ný!

Gjafabréfið má kaupa með því að smella á rauða hnappinn á forsíðunni eða smella hér!

Seinna tölublað Skógræktarritsins 2020 er komið út

Eftir Fréttir

Að venju er að finna í ritinu áhugaverðar greina um hinar fjölbreyttu hliðar skógræktar. Að þessu sinni má meðal annars finna greinar um Tré ársins 2020, útikennslu, áhrif furulúsar á lifun og vöxt skógarfuru á Íslandi, tálgun, blandskógrækt, stofnun Heiðmerkur, skógartölur ársins 2019 og útbreiðslu og áhrif ertuyglu á ungskóga.

Kápu ritsins prýðir myndin „Alien Hourgarden“ eftir Kristinn Má Pálmason.

Frádráttur vegna kolefnisjöfnunar

Eftir Fréttir

Samkvæmt breytingu á lögum um tekjuskatt, sem samþykkt var nú í sumar, mega lögaðilar draga framlög til kolefnisjöfnunar (allt að 0,85% af árstekjum) frá tekjum og á þetta við um aðgerðir í rekstri til kolefnisjöfnunar, sem og fjárframlög til skógræktar, uppgræðslu og endurheimtar votlendis. Lögin taka gildi 1. janúar 2021 og koma til framkvæmda fyrir tekjuárið 2020.

Nánari upplýsingar má finna á heimasíðu Alþingis – https://www.althingi.is/altext/150/s/0027.html